1. საჯარო ინფორმაციად მიიჩნევა ოფიციალური დოკუმენტი (მაგალითად, ნახაზი, მაკეტი, გეგმა, ფოტოსურათი, ელექტრონული ინფორმაცია და ა.შ), რომელიც დაცულია საჯარო დაწესებულებაში, აგრეთვე საჯარო დაწესებულების ან მოსამსახურის მიერ სამსახურეობრივ საქმიანობასთან დაკავშირებით მიღებული, დამუშავებული, შექმნილი ან გაგზავნილი ინფორმაცია. 2. საჯარო ინფორმაცია ღიაა, გარდა კანონით გათვალისწინებული შემთხვევებისა და დადგენილი წესით სახელმწიფო, კომერციულ და პირად საიდუმლოებას მიკუთვნებული ინფორმაციისა.

1. ნებისმიერ პირს აქვს უფლება მოითხოვოს და გაეცნოს ადმინისტრაციულ ორგანოში დაცულ საჯარო ინფორმაციას. 2. საჯარო ინფორმაციის მისაღებად საჭიროა წერილობითი განცხადების წარდგენა. 3. საჯარო ინფორმაციის მოთხოვნის მოტივსა და მიზანზე მითითება აუცილებელი არ არის.

1. საჯარო დაწესებულება ვალდებულია გასცეს საჯარო ინფორმაცია დაუყოვნებლივ ან არა უგვიანეს 10 დღისა, თუ საჯარო ინფორმაციის მოთხოვნაზე პასუხის გაცემა მოითხოვს სხვა დაწესებულებიდან ინფორმაციის მოძიებასა და დამუშავებას; სხვა საჯარო დაწესებულებასთან კონსულტაციას; მნიშვნელოვანი მოცულობის ერთმანეთთან დაკავშირებული ცალკეული დოკუმენტების მოძიებასა და დამუშავებას. 2. თუ საჯარო ინფორმაციის გაცემისთვის საჭიროა 10 დღიანი ვადა, საჯარო დაწესებულება ვალდებულია მოთხოვნისთანავე აცნობოს ამის შესახებ განმცხადებელს. 3. საჯარო დაწესებულების უარი საჯარო ინფორმაციის გაცემის შესახებ განმცხადებელს უნდა ეცნობოს დაუყოვნებლივ. ინფორმაციის გაცემაზე უარის თქმის შემთხვევაში საჯარო დაწესებულება ვალდებულია გადაწყვეტილების მიღებიდან 3 დღის ვადაში პირს წერილობით განუმარტოს მისი უფლებები და გასაჩივრების წესი. 4. პირს უფლება აქვს მიმართოს სასამართლოს და მოითხოვოს როგორც ქონებრივი და არაქონებრივი ზიანის ანაზღაურება, ასევე საჯარო ინფორმაციის გაცემაზე უარის თქმის, საჯარო ინფორმაციის გასაიდუმლოების, არასწორი საჯარო ინფორმაციის შექმნისა და დამუშავებისათვის, პერსონალური მონაცემების უკანონო შეგროვების, დამუშავების, შენახვის და გავრცელებისათვის, აგრეთვე მათი სხვა პირისა ან საჯარო დაწესებულებისათვის უკანონოდ გადაცემისა და სხვა მოთხოვნათა დარღვევისათვის.